Selected quad for the lemma: england_n

Word A	Word B	Word C	Word D	Occurrence	Frequency Band	MI	MI Band	Prominent
england_n	king_n	lord_n	march_n	2,537	5	8.9752	4	false

Text snippets containing the quad

ID	Title	Author	Corrected Date of Publication (TCP Date of Publication)	STC	Words	Pages
A14444	Hier begynneth the booke callyd the Myrrour of the worlde ...; Image du monde. English.	Gossuin, of Metz, attributed name.; Caxton, William, ca. 1422-1491.; Vincent, of Beauvais, d. 1264, attributed name.	1490 (1490)	STC 24763; ESTC S109670	102,455	172

the wondreful dyuision therof in whiche booke a man resonable may see and vnderstande more clerer by the vysytyng and sayeng of it And the fygures therin the sytuacion moeuyng of the firmament how the vnyuersal erthe hangeth in the myddle of the same As the chapitres here folowyng shal more clerly shewe declare to you whiche said book was translated out of latyn in to frensshe by the ordynaūce of the noble duk Iohan of Berry Auuergne the yere of our lord MCC.xlv And now at this tyme rudely translated out of frensshe in to Englissh by me symple persone Wyllm Caxton at the request desire coste dispense of the honourable and worshipful man Hugh Bryce alderman and Cytezen of londen entendyng to present the same vnto the vertuous noble puyssaūt Lord wyllm lord hastynges lord Chamberlayn vnto the most Crysten kynge kynge Edward the fourthe kynge of England of Fraunce c. and lieutenaūt for the same of the toun of Caleys marches there whom he humbly besecheth to resseyue in gree thāke whiche book conteyneth in alle .xxvij. chapitres .xxvij. fygures wythout whiche it may not lyghtly be vnderstande for to declare more openly it is ordeyned in thre partyes Of whiche the first conteyneth xx chapitres viij fygures Te seconde partie xxxiij chapitres ix fygures And the therde conteyneth xxiiij chapitres and x fygures whiche was engrossed in all poyntes ordeyned by chapitres and fygures in frenshe in the toun of Bruggis the yere of thyncarnacion of our lord M. CCCC.lxiiij in the moneth of Iuyn And emprysed by me right vnable of lytil connyng to translate brynge it in our maternal to●ge the second day of the moneth of Ianyuer the yere of our sayde lord M. cccc.lxxx in thabbay of westmestre by londen humbly requyryng all them that shal fynde faulte to correcte amende where as they shal ony fynde And of suche so foūden that they repute not the blame on me but on my copie whiche I am charged to folowe as nyghe as god wyl gyue me grace whom I most humbly beseche to gyue me sciēce cōnyng lyf taccomplysshe wel to fynysshe it c. THenne who so wylle comprise vnderstande the substaūce of this present volume for to lerne knowe specially the creacion of this world the gretenes of the firmament and lytylnes of therthe in regard of heuen how the vij sciences were founden and what they bee by whiche he may the better auaylle in knowleche all the dayes of his lif Thēne late hym rede this sayd volume treatably auisedly and ordynatly that in suche thing as he shal rede he suffre nothyng to passe but that he vnderstonde it right wel And so may he knowe and vnderstonde verytably the declaracion of this sayd volume And he thenne that so wylle obeye this cōmaundement May by the contente of the same lerne grete partye of the fourme condyciō of this world ¶ And how by the wyl of our lord it was by him created made complysshed And the cause wherfore it was establysshid wherof the debonayr lord hath don to vs so grete grace that we euer ben bounden to gyue hym lawde worship or ellys we had not ben of ony valew ne worth ony thyng nomore than vnersonable beestis Thenne late vs praye the maker creatour of al creatures god almyhty that at the begynnyng of this book it liste him of his most bou●teuous grace to departe wyth vs of the same that we may lerne And that lerned to reteyne and that reteyned so teche that we may haue so parfyght science and knowleche of god that we may gete therby the helthe of our sowles and to be partyners of his glorye permanent wythout ende in heuen Amen ¶ Hier begynneth the booke callyd the Myrrour of the worlde And treateth first of the power and puyssaunce of god Capitulo primo WE ought to knowe that whan our lorde god made the worlde And that he had made alle thynges of nought he had no nede of it For as moche had he byfore as he had afterward certainly god was to fore And shal be incessantly after wythout ende and wythout begynnyng ¶ Thenne he shal nothyng amende ne be better For hym faylled neuer ony thynge he seeth all hereth all knoweth alle And holdeth alle thynge in his honde He had neuer hunger ne thurste ne tyme ne daye ne hour but abydeth contynuelly in alle goode For to hym ne aperteyneth soone ne late And of alle them that euer were that ben and shal be haue alway ben and shal be to fore his eyen as well the ferre as the nyghe And the euyll as the goode he sawe as wel the world er it was made and fourmed as he doth now at this daye ¶ And yf he had neuer made the worlde as moche had he ben thenne worth and of as grete valewe as he euer myght haue be ¶ For other wyse he myght not be god Yf he knewe not sawe and herde alle that myght be And yf he were not soo he sholde be lackyng and not myghty of euery thynge ¶ And of so moche he was and shold be a mortal man but his nature was not suche For he is god entierly and hooll wythout begynnyng and wythout ende Nothyng is to hym newe ne olde Alle wee l and goode thyngis ben his by right And by nature goon and retourne ageyn to hym For fro hym alle thynges procede and meue And retornyng to hym in holdyng the right waye He retcheth neuer of ony harme For his bounte is alle pure clene hool and clere wythout ony espece of euyll Certes alle euyll is ben to hym contraryes And therfor it is pure necessite that they wythdrawe them vnder hym fro all his goodnes for it is nothyng but donge and ordure whiche must nedes d●scende in to the deppest And the good thyngis must nedes goo vpward to fore the souerayn creatour whiche is clere net and pure And the synnes whiche ben obscure horryble and derke aboue alle other thyng seuen the goode whiche is aboute god and auale and goo doun For so behoueth it to be by rayson and nature Alle in lyke wyse as we see the ordure of the wyn that is put in the vessell and the ●oule departeth fro the clere In suche wyse as the good and clere abydeth aboue ¶ And the lye whiche is thordure abydeth byneth in the bottom as infecte and not goode And the good wyn that is aboue abydeth alwaye clere and fyn ¶ And that whiche is not good that is benethe in the bottom abydeth alway obscure fowle and black And so moche the more as the wyn is good and more clere so moche more reteyneth the lye more of fylthe and obscure thus is it of the good and euyll For the euyll muste descende in to places derke and horryble and full of all sorow and bitternesse ¶ And so moche more